2Cor 3 | BDD | STEP | Togidega, 'abehega 'agwae gagasa mumugama 'ausalana weyahina? Geya'abwa. Ma hesi tomota tupwadi nuwanuwadi 'idi leta 'igwaeya, “Leta bewa 'ana to'ewa'ewa mumugana 'ausalana.” Genuwama 'ima letaina walele gidemusa, bo nuwana tomota hagadi 'ima letao sileledi gidemusa.

2 Corinthians 3

Loina hauhauna weyahina

1 Togidega, 'abehega 'agwae gagasa mumugama 'ausalana weyahina? Geya'abwa. Ma hesi tomota tupwadi nuwanuwadi 'idi leta 'igwaeya,

“Leta bewa 'ana to'ewa'ewa mumugana 'ausalana.”
Genuwama 'ima letaina walele gidemusa, bo nuwana tomota hagadi 'ima letao sileledi gidemusa. 2 Weyahina 'omi tuwa 'ima letaowedi, ma tomota mabwaiyadi 'oimiyega sihasili, ma 'oinega 'imi mumuga 'ausalana si'ita ma 'ima paihowa 'oimiya sida sanapu 'abehega 'ausalana, 3 ma nage 'oinega wahe'itadi 'abehega 'omi tuwa leta Keliso 'oinega, Yehoba tauna mayawasina Yaluyaluwanega 'ileleya, geya 'ebelele 'oinega, nuwana dimwa tabatabadi 'oidiya, ma hesi tomota 'atena, ma 'omi gide leta, ta 'a'ebwayaegomiya tomota mabwaiyadi 'oidiya.

4 Bewa weyahina Keliso 'ina 'abihetenega 'a'atepatuwa Yehoba matana. 5 Geya 'abehega tauma weyahima 'agwaegwae hanehane ma 'agwae, “Tauma 'ima bwebwe'ana 'oinega paihowa 'apaipaihowadi,” ma hesiyage Yehoba 'iboimo 'i'abi'abi hewaiwaiyemai, 6 ma sowasowahina 'ina loina hauhauna weyahina 'ahehetopaihowa. Loinaina hauhauna geya lelelelena, ma hesi Yaluyaluwa Tabuna 'oinega, weyahina loina lelelelena 'amasa 'i'ebwaegita, ma tuwa loinaina Yaluyaluwa Tabuna 'oinega yawasida miyamiya hatayana 'i'ebwaegita.

7 Ma loina miyamiyana 'amasa weyahina, ma dimwa tabatabadi 'oidiya silelediya ta Yehoba Mosese 'i'ebwaeya, 'asilala madouna 'alona, ta Mosese manina 'oinega 'asilala 'isaesae ma tupwana 'imiya 'amana, ma 'oinega wete 'isawala, ma tutaina Mosese manina 'isaesae meIsileli geya sowasowahina ma si'ebubu. 8 Coinega tasanapuya 'abehega loina hauhauna Yaluyaluwa Tabuna 'oinega 'ina wasawasa madou hedade 'asilalaina. 9 Loina miyamiyana 'oinega tomota yatala siloba ma hesi loina ma'ina wasawasa 'asi'asilalana. Loina hauhaunaina mumuga dumwaluna 'i'ebwaegita ta 'ina wasawasa 'asilala hedade. 10 Wete loina miyamiyana 'ina 'asilala 'ana 'ita gide sawasawalina, ma hesi loina hauhauna 'ina 'asilala bwebwe'ana hedade. 11 Loina miyamiyana geya 'ida miyahataya, ma hesi 'asi'asilalana, 'oinega tasanapuya 'abehega loina hauhauna tauna miyamiya hatayana ma 'asilala hedade.

12 Tanuwatuhu yahiya 'abehega loina hauhauna 'oinega tabwebwe'ana hataya, ma weyahina ta'atepatu, 13 ma Mosese geya gide tauda, weyahina Mosese manina 'asilalana nata 'isawala, ma 'i'ahu 'au'ausiya ta 'abehega sahena meIsileli si'ita'ita.

14 Moisa, meIsileliyedi nuwa potapotadi, mwalohene ta nige, weyahina 'abwa tuwa bewa 'eguma loina miyamiyana 'ana hasila sihesagohe, nuwadi sitala 'au'ausidi 'idi nuwa potepotega, ma sahena sinuwanuwa sabwalena, ma Keliso 'iboimo sowasowahina tala'ausina 'i'ewa yahuledi.

15 Moisa, mwalohene ta nige 'eguma Mosese 'ina loinao sihesagohedi, nuwadi sitala'au'ausidi ma geya sinuwa sabwelenidi, 16 ma hesi 'eguma 'aigeda taiya 'i'itahila 'ida Badaina 'oina 'ihemisa, beno tala'au'ausina 'i'ewayahule. 17 Ma Bada tauna Yaluyaluwa, ma Badaina Yaluyaluwana 'ada tolihasa. 18 Coinega geya 'aigeda 'ahubodaboda manida 'imiyamiya, ma Bada 'ina wasawasa 'asi'asilalana 'oina ta'e'ebubuna, ta tupwana ma tupwana 'ibuibuigita tauna 'ana 'ita 'asi'asilalana gide. Paihowa bewa Badaina 'oinega, tauna yaluyaluwa tuwa.